Francia P. Guiruela

Pagmumundo

kan ika nawara ako nagmundo
garo ko pasan ang buong mundo
dai ko magibong lingawan ka
huli ta minomotan kang tunay talaga

sa tahaw kang kadikloman ako naghihibi
ginigiromdom an mga aldaw na kita magkaibahan
magabat sa pagmati na ako nawalat
mayong kadamay, mayong maski sisay

hanggang nuarin ako matios
sa kulungang ako man sana ang may gibo
makadulag daw ako sa katotohanan
o kaipuhan ko nang gabaon an kulungan

Eric Russel Sabularse

LIBOD

Mga bitoon sa langit,
saimong mga mata.
Asin bulanon mong mukha,
moot kong daraga.

An saimong kamot,
an kugos mong maginhawa,
ngirit mong magayon,
katuninungan an dara,

Maribok na kinaban,
dali-daling dulagan ta.
Asin sa saimong paraiso,
maduman kita.

Mangiturugan kita,
isipon ang maogma.
Ubuson ang panahon,
sa duyan, kitang duwa.

JENNY GREAMP O. GIMPAYA

TUNINONG NA KAPALIBUTAN

mati ko ang duros na naghahali sa kakahuyan
asin ang liwanag na nagpupukaw sa kapalibutan
na nagdadara ning gayon sa laog kan kinaban
na pirit na pigraraot kan mga katawohan

sa maraabot na bagong hinirasyon
pangatamanan asin lugod na pagayonon
huli ta ini nagdadara ning gayon
sa gabos na katawohan

Michelle Villafuerte

KATUNINUNGAN

Langit na mahiwas
garo dagat na pwedeng langoyan
kasiraman sa buhay
ginhawa nanggad ang makukua

Ang buhay digdi sa kinaban
daeng suba suba
kung ika maluya luya
daeng siram mabuhay

Kung ika magmamawot
na maging maogma
makukua mo yan
pag nakaabot sa langit na matuninong.

Pungaw na Daraga

Pwerte ang liwanag na naghahaplos

sa sakong palibot dulot kan mga aninipot

na kung anong maraot na duros

ang naghihigda sa kalangitan pirit

na nagpapaguiromdom sa mga panahong

dai ko malilingawan.

Ang paoy kong puso sige ang deritso

na raya-raya na sa apod ning kalag,

na maindata na namamate ang pait ning kinaban

inikit ko ang mga bihirang oras na madugtungan

ang pirang buhay na iyo ang nagpadangog

nin musika sa sakong pagdangog

nagsilbing bituon sa madoot kong agihan,

puon kan bayaan ako kan saimong liputok na pagkamoot,

na iyo ang nagatatao ning kusog

na magpadagos dawa sa ribok kan pag itok kan buhay.

Garu duyan na dae nalalabot

na dawa aboton nin makusog na duros

na iyo ang nagpapadpad sa mga anininpot

ta ngarig magbalik guiraray an saimong

pangako na dae mo bubutasan.

Pwerte lang and liwanag na naghahaplos

sa sakong sapat na hawak

na nagdadalihig sa sakong mata

ang pungaw sa imo aki ko

habang nagdadapo ang ngisi sa nguso mo

sige ang pagsabi sako na padangat taka

mahilingan ulit kita

ako an saimong kusog.

Prepared by:

Jessica Peñaflor

Eric Russel C. Sabularse

PAG-TUYAW

Tigsik ko an sakuyang barkada,
aroaldaw nag-iinom sa sala,
mala ta sayasay baga,
mapuruon na naman pagkaaga.

Tigsik ko giraray si barkada
ta mapadoktor ning resibo daa
ako si ma-iyo man sana
nakikbakan na naman si mama nya

PAG-OMAW

Tigsik ko an sakuyang bata,
na nasa sa Dubai nagtatrabaho na,
mauli siya ngunyang fiesta,
an pagmati ko maogma.

Tigsik ko si pading Kobe
kumapot ning bola matindi
sikat asin mayaman kong padi
may mga sing-sing na asin trophy
ngoniang taon siya pa ang finals MVP

BOROBENTOT

Tigsik ko si Cho Mon
parapataya ending sa harong
dyis pesos mo saiyang hahagadon
pag tuminama ka, dapat may painom

Tigsik ko man ining si mamay
puro na lang baga pasakit sa buhay
kang sa pwesto tuminukaw sabi daa kita mapaparahay
mala ta siya man lang ang ayahay
kitang pilipino mayo nang pambakal tinapay

PAKONSUELO

Tigsik ko satuyang mga magurang
na sa kada saro minatarabang
trabaho digdi trabaho duman
para mabuhay kitang magturugang

Tigsik ko ang parabalot
ta dawa matanga sige an libot
makapabakal lang ning masiram na sugok
nganing kumusog ang satuyang mga tuhod

Tigsik

Alfredo A. Espinola III

Pag-omaw

Tigsik ang mga maestra,
ta dawa kadikit ang nakukuang kwarta
sige sana para sa saindang pamilya.

Tigsik ko si sir Jacob,
simplehon mag-tirada
pero premyado sa saiyang mga obra maestra.

Pag-tuyaw

Tigsik ko ang mga politiko
kadakul promisa bago an eliksyon,
makatukaw sana sa posisyon,
mala ta kang nakatukaw na sa posisyon
daeng data man ang serbisyo sa pobliko.

Tigsik ko an mga traffic enforcer,
pito digdi, pito duman
para digdi para duman,
alagad maski mayong bayolasyon
tig-titikitan makakua lamang nin pagkakwartahan.